Join the new world

Još Horvatska ni propala,
dok mi živimo;
visoko se bude stala.
kad ju zbudimo:
ak je dugo tvrdo spala,
jačja hoće bit,
ak’ je sada vu snu mala,
če se prostranit.

Večkrat senja čudne senje
slatke radosti,
kada se joj kažu tenje
jake mladosti;
Drugda pako magle crne
nju opstiraju,
kada sestre njoj neverne
nju zaptiraju.
(....)
Jenput čuje svoje sine
složno pevati,
složne glase u visine
tako zdigati:
“Braća danas kolo vodi,
danka svetkuje,
Horvatska se preporodi,
sin se raduje.”

V kolu jesu vsi Horvati
Stare Države.
Starom Kralju verni svati
z Like, Krbave,
Krajnci, Štajer, Gorotanci
i Slavonija,
skup Bošnjaci, Istrijanci
ter Dalmacija.
Vsi Horvati se rukuju,
i spoznavaju,
istinski se sad kušuju,
reč si davaju;
Neka znaju sveta puki
njihov novi zvez,
hvalit čeju vnukov vnuki
slavni narod ves.
Nudar, braćo, čaše z vinom
sad napunie,
zdravicu Horvatskem sinom
vernem napite,
neka žive naša sloga,
vsaki pravi Slav,
pravi sinko Roda svoga
Neka bude zdrav.