مصر مش بس غيرت قانون الفيفا بسبب شوبير،لا دي مصر ليها ذكريات في تاريخ العالم

Day 3,851, 06:12 • Published in Egypt Egypt • by zozotop

مصر مش بس غيرت قانون الفيفا بسبب شوبير، لا دي مصر ليها ذكريات بقت ايام مترسخة في تاريخ العالم كله،

يوم ٢١ فبراير هو اليوم العالمي للطلاب اللي بيحتفل بيه الكوكب كله، اليوم ده مصري بحت .

ازاي!

اليوم العالمي للطالب ، مناسبة عالمية تقام سنويا في العالم كله ، ده اللي نعرفه، اللي متعرفهوش بقا ، اشمعنا اليوم العالمي للطالب؟ ايه قصته ؟

بص يا سيدي ، بإختصار شديد ، سنة ١٩٤٥ شهر ديسمبر ، النقراشي باشا رئيس الوزراء في مصر هنا بعت طلب للحكومة البريطانية لمنافشة الجلاء عن مصر ، اصل الحرب العالمية خلصت و بقا فيه امم متحدة دلوقتي ، وكان فيه وعد بالأستقلال بعد الحرب العالمية والدنيا حلوة،

بريطانيا بقا رجعت في كلامها وردت عليهم و قالتلهم مش هنمشي وهنلتزم بمباديء دستور ١٩٣٦م اللي هوا استقلال عبيط كدة، اسما بس لكنهم موجودبدين ومسيطرين ،

طب و بعدين؟ اتحاد الطلاب في جامعة فؤاد الاول او القاهرة بقا اللي زعلوا عالاخبار دي، عملوا مؤتمر في الجامعة يوم ٩ فبراير سنة ١٩٤٦ وفضلوا يسخنوا في العيال، و الاحتلال الغاشم ومش هنسكت و بتاع،

وخرجوا في اضخم مظاهرة بعد الحرب العالمية التانية على مستوى العالم ، خرجوا من شارع الجامعة للجيزة لكوبري عباس متجهين لقصر عابدين،

النقراشي باشا اللي كان وزير الداخلية ، جاتله الاوامر انه يتعامل مع العيال دي، و اللي بدوره مرر الامر لحكمدار القاهرة رسل باشا الانجليزي، وحكمدار الجيزة فيتدباترك الانجليزي بردو انهم يخلصوا الموضوع ده،

فا قوات الشرطة جريت على كوبري عباس اللي كان الطلاب بيعبروه، و قفلته من الجانبين، و راحت فاتحاه" كان كوبري عباس بيتفتح ايامها"، فا العيال وقعت في النيل و ماتت ، و اللي موقعش اتقبض عليه و اتهان و اتعذب بعدها،

اكتر من ٢٠٠ طالب غرقوا من خيرة شباب الجامعة واغلبهم من كلية الطب، كانت فاجعة .

في ١٢ فبراير عمل الطلاب جنازة صامتة على ارواح الشهداء، قدام كلية طب جامعة الازهر، وكانوا لسة هيعملوا مؤتمر للتنديد لكن الأمن اتدخل وقبل على ٥٠ طالب بقسوة وشربوا تار عليهم عشان يفرقوهم،

سخن الناس، والحكومة صادرت الجرايد اللي فيها اخبار عن الاعتقالات والقمع بحجة تهييج الرأي العام، لكن المصريين مسكتوش، الجمعيات والحركات كلها تضامنت مع الطلاب، وانضم للمظاهرة ناس من كل شكل ولون، واتوسعت المظاهرات في كل المحافظات، فالبوليس رد بالعنف وتعليق الدراسة ٣ ايام وحظر تجوال، لكن المظاهرة توسعت وخرجت من بولاق وشارع فؤاد وغيرها.

خرج الملك فاروق يومها عشان يكرم النقراشي باشا بشكل بارد ويوهبة قلادة محمد علي ، وكأن ارواح الطلاب دي ملهاش لازمة يعني، فا تصعد الموقف ..

وهنا خرجت دعوات للاضراب العام بسبب الحادثة دي، و فعلا يوم ٢١ فبراير لبى الدعوة طلاب مصر و العالم كله اللي سمع عن اللي حصل واتأثر بكم الوفيات اللي حصلت بسبب مظاهرة سلمية،

فا اضرب يومها طلاب لبنانيين و سودانيين و امريكان وانجليز كمان وخرجت مظاهرات في جامعات زي كامبريدج واكسفورد و سوريين وحتى الصين والهند وغيرهم ،
وحصلت مظاهرة في ميدان التحرير و فيها ضربت افراد الجيش البريطاني النار على المصريين و مات ٢٨ متظاهر تاني،

فقام المتظاهرين من الطلاب بحرق معسكرات وثكنات بريطانيا في مصر، هجموا عليها، و تضامن الطلاب على مستوى العالم مع مصر وقتها قلبا وقالبا،

لحد ما الملك فاروق قرر تغيير الحكومة و تكوين حكومة جديدة بقيادة إسماعيل باشا صدقي، وانسحبت القوات البريطانية من الصورة خالص، و هدأت الامور،

و تحول اليوم ده عالميا الى يوم الطالب العالمي اللي بيحتفلوا بيه سنويا بسبب درامية فتح كوبري عباس عالطلاب، وبكدودة تبقا مصر غيرت تاريخ المقاومة اليوم ده وعلى حسها قام يوم الطالب العالمي.

وشكرا.[img][/img]