From Qırımtatar

Day 2,308, 02:02 • Published in Turkey Ukraine • by imamradyk

Ukraina Yuqarı Şurasına Ukraina halqı – epsi milletlerge mensüp Ukraina vatandaşlarına

Qırımtatar halqı Meclisiniñ Ukraina Yuqarı Şurasına, Ukraina halqı – epsi milletlerge mensüp Ukraina vatandaşlarına
Muracaatı
Qırımtatar halqınıñ tolu vekâletli organı - Qırımtatar halqınıñ Meclisi
- qırımtatarlarnıñ ve Qırımnıñ, angi milletke mensüp olğanından qatiy nazar, epsi sakinleriniñ havfsızlığı ve serbestligi telüke altında bulunğanda,
- yabancı devlet tarafından Qırımnıñ işğal etilmesi ve doğrudan-doğru arbiy qarışuv neticesinde yüz berecek aqibetlerniñ kölemini tahmin etkeni alda,
- qırımtatar halqınıñ bugünki ve kelecek nesilleri ögünde büyük mesülietini sezgeni alda,
- Qırım 1783 senesi işğalinden soñ qırımtatar halqı çoqasırlıq devletçiliginden mahrum olaraq, başından keçirgen ğayıplar, aqaret, azap-uqubetler, repressiyalarnı unutmağanı alda,
- Qırımtatar halqı tarihiy Vatanından zorbalıqnen sürgün etilgen 1944 senesi mayıs 18 soyqırımınıñ tekrarlanmasına yol bermemege tırışqanı alda,
- öz aqları oğrunda küreşniñ qansız, zorluqsız usullarına esaslanğanı alda,
- öz-özüni belgilev aqqına kefillik bergen ve tanılğan halqara vesiqalar – BMT Nizamnamesi, BMT Baş Assambleyasınıñ 1960 senesi dekabr 14-te alınğan № 1514 (XV) qarar, 1966 senesi dekabr 16-da qabul etilgen İqtisadiy, içtimaiy ve medeniy aqlar aqqında halqara añlaşma ve vatandaşlıq ve siyasiy aqlar aqqında halqara añlaşma, 1970 senesi oktâbr 24-tte BMT Nizamnamesine muvafıq qabul etilgen devletler arasında dostane munasebetler ve işbirlikke ait halqara uquq deklaratsiyasınıñ printsiplerine esaslanaraq,

- BMTniñ 2007 senesi sentâbr 13-te qabul etilgen "Tamır halqlarnıñ aqları aqqında", cümleden aşağıdaki maddelerni közde tutqan:
a) tamır halqnıñ özyerklik aqqını (3-nci madde),
b)tamır halqnıñ muhtariyet ve kendisi idare etüv aqqını (4-nci madde),
v) tamır halqnıñ özü yaşağan devletniñ siyasiy, iqtisadiy, içtimaiy ve medeniy ömürinde öz istegine köre iştirak etmek aqqını (5-nci madde)
g) tamır halq yaşağan hududda onıñ razılığı ya da onıñ bu aqta ricası olmadan arbiy faaliyet alıp barılması yasaqlanğanı (30-ncı madde),
d) tamır halqnıñ devletler ve diger taraflar ile davalarnıñ adaletli çezim protsedurasında iştirak etmege aqqını (40-ncı madde)
ye) Deklaratsiyanıñ nizamları mustaqil ve serbest devletniñ territorial ve siyasiy bütünligine zarar ketirgen şekilde añlatılması ve qullanılması yasaq etilgeni (46-ncı madde) Deklaratsiyasına esaslanaraq,
- 1991 senesi iyün 28-de Qırımtatar halqınıñ 11 Qurultayında qabul etilgen Qırımtatar halqınıñ milliy mustaqilligi aqqındaki deklaratsiyağa esaslanaraq,

- Qırımtatar halqı aqlarınıñ ğayrıdan tiklemek ve qırımtatar halqınıñ Qırımda tamır halq statusını belgilemek içün Ukraina devleti oña bağlı iç bir şey yapmadı ve neticede resmiy akimler tarafından aqsımlanğan, dep sayğanımız alda bütün ukrain halqına, Ukraina Yuqarı Şurasında onıñ vekillerine aşağıdakiler ile muracaat etemiz:

1) Ukrainanı mevcut sıñırlarda serbest ve mustaqil devlet dep sayğanımıznı tasdiqlaymız;
2) Rusiye Federatsiyası tarafından agressiya areketini keskin qaralap, bu areketlerni mevcut devletlerara munasebetler sisteması, halqara uquqnı qaba sürette bozuv, dep sayamız;
3) Qırımnıñ territorial mensüpligini deñiştirmek maqsadınen 2014 senesi mart 16 künü keçirilgen Qırım referendumını Ukraina Anayasası ve halqara uquqqa uyğun ve qanuniy dep saymaymız;
4) Qırımnıñ kelecegini Qırımnıñ tamır halqı – qırımtatar halqınıñ serbest istegi olmadan belgilemek areketlerini kesinliknen red etemiz;
5) qırımtatar halqı angi devlette yaşamağa aqqı olğanı aqqında qararnı faqat qırımtatar halqınıñ özü alabilir;
6) qırımtatar halqı aqlarınıñ ğayrıdan tiklenmesi ve öz tarihiy Vatanında öz-özüni belgilev aqqı mustaqil ve serbest Ukraina devleti erkânıda amelge keçirilmesi kerekliginde eminmiz;
7)Qırımdaki er angi akimiyet qırımtatar halqınıñ razılığı ve istegini serbest ifade etkeni şaraitte şekillenmek ve faaliyet köstermek kerek, dep sayamız;
😎 Ukraina Yuqarı Şurasını BMTniñ Tamır halqlarnıñ aqları aqqındaki deklaratsiyasına qoşulmağa çağıramız;
9) Qırımtatar halqı Qırımnıñ tamır halqı olğanı tanılması ve Ukrainanıñ qanunları ve diger uquqiy aktları ile pekitmege çağıramız;
10) Ukraina Yuqarı Şurası ve devletniñ diger akimiyet organlarını deral ve halqara teşkilâtlar (BMT OSCE, Avropa Şurası, Avropa Birligi)nen birlikte qırımtatar halqınıñ tamır halqlarnıñ aqları aqqında halqara aktlarda közde tutulğan aqlarını amelge keçirmek, qırımtatar halqınıñ öz tarihiy toprağı Qırımda öz-özüni belgilemek aqqını elde etmek içün serbest istek bildirmesini teminlemege çağıramız.

Refat Çubarov
Qırımtatar halqı Meclisiniñ reisi
2014 senesi mart 15, Aqmescit ş.