Join the new world

لسنين طويلة تشيلي كانت واحده من المستعمرات الاقتصادية بتاعت امريكا.

امريكا كانت بتشفط منها النحاس وراكبة علي الاتصالات وشوية مصانع بتاعت منتجات استهلاكية تانية وكانت دي سبوبة بيسترزق منها شوية رجال اعمال علي شوية جنرالات من الجيش اللي كانو مسيطرين علي البلد .

كانو مسيطرين اقتصاديا عن طريق المصانع الامريكية اللي بيلقطوا منها عيشهم وسياسيا بالتزوير والقمع واخر واحد طبخوله انتخابات رئاسة كان اسمه "ادواردو فيري" وطبخوها ضد واحد اسمه "سلفادور ايندي". ايندي ده كان طبيب مركسي راجل مش مميز قوي لكن الخبرة اللي اخدها في الانتخابات الرئاسية اللي خاضها وسقط فيها ثلاث مرات حطته علي راس التحالف الشعبي اليساري في مواجهة الحزب المسيحي الديمقراطي الحاكم الموالي لامريكا.

سقط ايندي فى52 و58 و64 وكان هيربعنهم في 1970 الا ان واحد من جنرالات الجيش اسمه رينيه شنايدر قرر انه يدافع عن حق الشعب في انتخابات نزيهة وأعلن دعمه لأيندي.

يشاء السميع العليم ان شنايدر ده يبقي وزير الدفاع . ودي تيجي؟! ازاي جيش بنصرف عليه يجيله واحد نضيف وهمه علي الشعب!!.. نيكسون الرئيس السابع وتلاتين لامريكا يتصل يمسي علي هنري كاسنجر مستشار الأمن القومي بتاعه ويقله فسحه فيتقتل رينيه شنايدر بعد شهور من توليه وزارة الدفاع فالموضوع يضرب في وش امريكا والناس تتعاطف اكتر مع ايندي ويكسب الانتخابات في شكل ثوري ويصبح أول رئيس منتخب بانتخابات نزيهة في تاريخ تشيلي وبوعود كبيرة للسياسيين الداعمين له بالاصلاح الاقتصادي والاجتماعي.

وبدأنا هنا الرقص علي السلم لا اللي فوق رضيو باللي بيعمله ولا اللي تحت شافو اصلاحه. حاول ايندي انه يسيطر علي الجيش بطريقة " يوتي يوتي بودي كماله عين ماما وكدهون" بطريقة القلادات المشهورة اللي احنا عارفينها طبعا الكلام ده فكس لكن في نفس الوقت الكلام ده زعل الحراك الشعبي السياسي اللي جاب ايندي اصلا وانتخبه علشان يقتصله من الفاسدين فكان الشعب مقضيها مظاهرات واضرابات والبلد حالها وقف فعامة الشعب الجعانه زاد جوعها وايندي هداه عقله انه يطلق الفلاحين و العمال يستردو او( يستولو) علي اراضي الاقطاعيين وأممله كام شركة امريكاني . في مايو 73 لطش في المحكمة الدستورية

حلها وعدل الدستور وجاب "بينوشيه" وزير للدفاع عشان يكون سنده في معاركه السياسية ويكون ولاء الجيش لايندي بس .

الحوسة دي كلها طبعا كانت باشراف وهندسة مهندس الامن القومي الامريكي هنري كاسنجر وبناء علي تعليمات مباشرة من نيكسون زي ماشايفين في الفيديو ده "نيكسون اعطي تعليماته للمخابرات بأن تجعل الاقتصاد التشيلي يصرخ".

"الخطة الاولي كانت منع ايندي من التنصيب كرئيس وبعد ان فشلت بسبب مقتل وزير الدفاع التشيلي رينيه شنايدر بأيدي الامريكيين كيسنجر قال لنيكسون الان ايندي اصبح الرئيس الخارجية تعتقد أنه من الممكن التعاييش معه ولكنني اريدك ان تقول لكل من في الحكومة الامريكية اننا لا نستطيع ان نتركه ينجح لأنه منتخب ديمقراطيا ولديه الشرعية(بيتركورنبلو-مؤرخ)"

الحزب الديمقراطي المسيحي المدعوم من امريكا كون جبهة انقاذ (اه والله سموها كده) ونزل الشوارع مع فئات الشعب المحبطة من أداء ايندي ويطالبو جنرالات الجيش المدعومين من امريكا انهم ينقذو البلد من ايندي المركسي المتطرف وهو ما قد كان ..ده التاريخ مش بيعيد نفسه ده بيستهبل .. ونزل بينوشيه يعلن توليه زمام الامور لانقاذ البلد بعد ما ضرب قصر الرئاسة بالاسلحة الثقيله وقتل ايندي او اجبره علي الانتحار الروايات هنا بتختلف ... وخرج قائد الجيش بينوشيه يقول " اللي عملته القوات المسلحه النهارده ده نابع من وطنيتها علشان تنقذ البلد من الفوضي اللي سببتها حكومة ايندي المركسية(هو انتو مش عارفين ان انتو نور عنيا ولا ايه !!)"

وفي هذه الأثناء في مكان اخر من العالم :"في أول مكالمة تليفون بعد الانقلاب حيث قال نكسون ل كاسنجر:ايدينا لم تظهر في هذه العملية أليس كذلك؟! فقال كيسنجر : نحن لم نفعلها(.يقصد المشاركة في الانقلاب) لقد ساعدناهم ..... المخابرات الامريكية هيأت الظروف كأفضل ما يمكن (بيتركورنبلو-مؤرخ) ". الشيخ الشعراوي الله يرحمه كان بيستدل علي وحدة الخالق بوحدة الخلق . ان في نمط مميز لمخلوقات ربنا سبحانه وتعالي تقدر تحس بيه وتشوفه .حاجه كده (ولله المثل الأعلي) زي ما الناس تقدر تميز موسيقي عمر خيرت ولوحات ليوناردو دافنشي نفس الكلام ينطبق علي الانقلابات ال:

"made in USA"

ماكينة المخابرات الامريكيه بترازي الشعوب بنفس المنتج المقزز مرة بعد مرة بعد مرة.. واللي مش مصدق امكانية علاقة امريكا بالانقلاب يراجع الفيديو بعنوان "تعلم اللغة الانجليزية مع الفريق عبد الفتاح السيسي" علشان يسمع كلامه هو شخصيا مع صحفية من الواشنطن بوست عن تنسيقه مع امريكا قبل الانقلاب .

ياتري بينوشيه عمل ايه بعد كده ؟وقد ايه الشعب التشيلي كان نور عينين بينوشيه وازاي حن علي الشعب التشيلي اللي محتاج حد يحن عليه ؟! وهل فعلا انقذ بينوشيه تشيلي من الضياع ؟! ده اللي هنجاوب عنه الحلقه الجايه كنتم مع العجايب والغرايب والانقلابات والاحتجاجات والشعوب المغيبه بنسافر نجيبهالكم من كل مكان في العالم وبنوعدكم كلها قديمة وبرنامجكم كله بالهجايص

مقطع فيديو في بداية الحلقة لوزير الدفاع التشيلي أوغسطو بينوشيه:

(اللي عملتو القوات المسلحة النهاردة ده نابع من وطنيتها علشان تنقذ البلد من الفوضى اللي سببتها حكومة أيندي المركسية.))

هو انتم مش عارفين ان انتم نور عنينا والا إيه؟!


وقفنا الحلقة اللي فاتت عند خطاب أوغسطو بينوشيه وزير الدفاع التشيلي سنة 1973 بعد ما لعب الدنيئة مع سلفادور أليندي رئيس تشيلي,

اللي كان اختار بينوشيه اللطيف الوديع وزير الدفاع عشان يكون دراعو اليمين للسيطرة على تشيلي, لكن بينوشيه خان العهد و القسم وانقلب على أليندي واقتلوه أو اجبره على الانتحار.

في سبتمبر 1973 تولت زمرة الجيش اللي هي عندنا زي المجلس الأعلى للقوات المسلحة كده إدارة البلاد.

والله الموفق والمستعان :-

في يونيو 1974 تولى بيونشيه الحكم وهدفه المعلن هو الحفاظ على هوية تشيلي من الماركسية المتطرفة ومنع الفوضى اللي كان هيتسبب فيها أليندي, وعلى طول في أول 6 شهور حل البرلمان وعطل الدستور وعين وزارة كلها متعلمة في أمريكا في جامعة شيكاغو وطبعاً رجع المحكمة الدستورية اللي كان حلها أليندي وعمل مذبحة للقضاة المعارضين للانقلاب.

(مع العسكر ما تقولش لأ)

نزق بسرعة هنا لقدام شوية في ظرف 3 سنين بس أباد المعارضة تماماً
45,000 معتقل , و 3000 قتيل

بس الظريف أنه بيونشيه أو بينوكيو - زي ما كان بيحبه يسموه- أنه كان برنس ومش بيكرر نفسو يعني مش طول الوقت أكشن و وزير الداخلية ومدرعات وقنابل وغاز ورصاص خارق حارق وتفويض والفلم الهابط دا.

ال 3000 اللي قتلهم كان فيهم فن في القتل وتنويع في الأداء ومحرمش حد من حاجة, كان بيقتل اللي ضدو وبيقتل اللي معاه.

مثلاً خد مني دي

بعد الانقلاب على طول بدأت اتحادات العمال اللي كانت مؤيدة لأيندي تنزل الشارع تتظاهر فراح بيونشيه لملو كم ألف منهم وعباهم في استاد سانت يغو وفتح عليهم النار ومات منهم كتير جداً ساعتها ولم يحصر العدد لحد دي الوقتي بالظبط,

عندك كمان في 2008 اعترف مدير مركز صحي أنه طور غاز سام لا يترك أثر استخدمه النجم بتاعنا في انه يقتل حبيبه وزميله في الانقلاب إدوار دو فري آخر رئيس تشيلي قبل أليندي, لو تفتكروا من الحلقة اللي فاتت هو دا اللي كان الجيش زورله الانتخابات قبل كده.

دا اللي كانوا سارقين..قاتلين..مزروين مع بعض..قتلوه

مش بس كده, دا كمان كان بيقتل في شعبو نيابةً عن أمريكا, من سنة 1974 لسنة 1976 شارك في العملية كوندور اللي كان بينسق فيها مع المخابرات الأمريكية لقتل المعارضين من شعبه.

هتفتكر أنت طبعاً مثلاً أنه الشامخ بتاعه تشيلي كان بيتهاون مع قيادات الجيش والشرطة اللي كانوا بينفذوا الجرايم دي.. يا أخي حرام عليك أنت فاكرهم ايه.. خارقين حقوق القاهرة..!

القضاء التشيلي حاكم 700 قيادة أمنية وعسكرية ادان منهم 70 من سبعمية

لا وسجن منهم ستين بس.

لأ وسجنهم فين؟؟ في دا (صورة مجمع منظم فخم) ..طيب بص ما بيفكرش دا بمزرعة طرة ..ها؟

والتشطيب ؟؟ زي سجن العقرب الشديد..افتكر

-كيف تصنع إرهابياً في بلدك بأبسط الخامات-

يهمني هنا قوي أنني اوضح حاجة خطيرة جداً جداً جداً

اليساريين في تشيلي كانوا فريقين, فريق عايز يقتل المعارضين كلهم ويخلص عليهم, وفريق تاني اللي كان بينتمي ليه أليندي شايف أنه الديمقراطية هي الحل, لدرجة أن روسيا كانت بتعيب على أليندي أنه لا مؤاخذة طري, وعلى عشان كده ما ساعدوهوش لأنه كان ضد العنف.

فيديو:

((لم يكن الروس وهم ينفقون ثروات لدعم كوبا راضيين عن أيندي,

لقد توصلنا إلى استنتاج سوف يطاح بهذا النظام قريباً

نيكولاي ليونوف –كبير محللين المخابرات الروسية-

لأنهم كانوا يحاولون إدارة البلاد بطريقة غاية في الديموقراطية بدون استخدام السلاح...لكسر مقاومة قوى معارضة أشد منهم.))

طول فترة حكم أليندي كان مسيطر على اليساريين كلهم لأن الوضع العام بقول الديموقراطية حلوة مافيش كلام, بعد الانقلاب لما الدنيا اتسدت في وشهم ولقوا أن الموضوع عافية ودراع بدأت مجموعات العنف تشتغل وهكذا يصنع الإرهاب.

التقارير بتقول أن ضحايا العنف السياسي من الشرطة في حدود ال 150 قتيل ومفقود, في ستين داهية دول شوية ضباط يا عم ولا يسوو عند بيونشيه حاجة وفي منهم كتير, المهم أن البلد دي الوقت تبئا زمامها في إيد بيونشيه

-وبكرة تشوفوا تشيلي –

عشان يبدا دلوقتى يحن ع الشعب التشيلي الجوعان المحتاج حد يحن عليه,

اللي نحن شايفينوه دا مقارنة سريعة ما بين الناتج القومي بتاع تشيلي في مقابل باقي دول أمريكا اللاتينية, في الأول ماشيين زي ما نحن شايفين فلة مع بعض لحد سنة 1973 سنة الانقلاب هوب اوف يا جدع البلد ضربت بلنص!!

بالرغم من حنفية الفلوس اللي انفتحت على راس بيونشيه من أمريكا إلا أنو يبدو أنو جيب بيونشيه كان كان مخروق وفاتورة الناس اللي ساعدوه في الانقلاب كانت كبيرة ولازم يحلي بق دا ويحلي بق دا

البلد اخدت الهئة واتزحلقت

ضيف على كده أنه الوزارة متعلمة تعليم أمريكاني اللي عينها بيونشيه اول حاجة عملتها رجعت الشركات اللي كان أليندي مأممها تاني لأمريكا

ولغت الدعم وبقت الدولة بتقول للمواطن :

مش هتدفع؟ هتدفع ؟ ها ها حوريك اللي ما شفتوش

هتدفع, إنما ببلاش؟ بلاش دا أنا ما عرفش حاجة اسمها ببلاش

واشتغلت بنظرية الصدمة الاقتصادية وانطلقت في خصخصة الدولة وبيع البلد وبسنة وحدة بسبب الشغل المفتخر دا التضخم وصل في تشيلي ل 370%

وبسنة 1981 تشيلي أفلست تماماً.

نجي بقا لسنة 1982 بيونشيه رفد الحكومة ورجع أمم الشركات الأمريكاني ورجع سياسات أليندي الاقتصادية

-نهاية سفاح-

حكم بينوكيو 17 سنة من 1973 ل 1990

وكان مؤلف لنفسو مادة كده على اوظا على مقاسه وباسمه في التعديل الدستوري سنة 1980 أنه لو خسر في الرياسة يرجع وزير دفاع تاني وكان بيقلهم – إن تنحط فقرة في الدستور تحصن الفريق السيسي في منصبه كوزير دفاع-

وراح عامل مادة تانية أنه لما يسيب وزارة الدفاع يبقى عضو برلماني محصن مدى الحياة.

في 1998 ساب وزارة الدفاع وراح عضو البرلمان العجوز لإنجلترا عشان يتعالج, لكن الإنجليز عكشوه وسجنوه سنتين وترحل لتشيلي سنة 2000 , الجيش التشيلي العظيم استقبلوا في المطار استقبال الفاتحين

لكن الحكومة المدنية المنتخبة المحترمة قفشت على السجين المرحل بيونشيه وغيرتله الدستور وضحكوا عليه وجوزوه هنومة وبدأت الملاحقات القضائية.

مات بيونشيه في 3 ديسمبر 2006 قبل ما ينحكم عليه في 300 تهمة

من غسيل أموال لتعذيب لقتل جماعي.

عايز تعرف ايه اللي خلا بينوكيو يحكم الفترة دي كلها؟

دا –صورة فتاة تقبل صورته-

-وهي مصر إيه؟! وتشيلي إيه؟!-

مقولة عبقرية : يا داخل مصر منك ألوف.

اول حاجة تخطر على بالك وانت بتحاول تفهم الجملة دي أن مصر فيها ناس كتيرة قوي فـ يلي داخل مصر في جوا ألوف

والحاجة التانية ممكن يكون المقصود أنه شعب مصر دا شعب عندو قدرة فظيعة على التلون فـ زي ما حتكون حتلاقي الناس بتعاملك

فـ لو أنت محترم حتلاقي الألوف من الشعب دا اتلونت وبقت محترمين زيك

ولو أنت بتاع لوع حتلاقي الشعب دا كلو بيشتغلك وبيزاولك

وبرضو بيكون الاحتمال المقصود أنه يا داخل مصر دخل قبلك ألوف فمتفتكرش نفسك عجبة او الناس ما عدتش عليهم زيك قبل كده.

طبعاً الكلام دا كان زمان ايام ما كان مصر بيدخلها ناس وبيجيها تجار وسواح لكن دي الوقتي أظن المقولة دي بتبقى اوقع شوية على اللي بيحكم مصر..
يلي عايز تحكم مصر منك ألوف

وراجعهم من أول اللي متمدد في المتحف فرجة لخلق الله

واللي انضربت في القباقيب واللي انطرد واللي اتسم واللي اتخرم واللي اتخلع واللي اتخطف

يلي عايز تحكم مصر عافية منك ألوف
الانقلاب هوه هوه بس مصر مش تشيلي