Ko son jo?

Day 1,601, 17:00 • Published in Croatia North Korea • by broc


Jo?
Ko son jo?
Mola od Jubota i Marine,
Mola čo lozja striže i obriže,
Masline čisti i bere,
Grozje nogima meje u mošt,
Pritoče vino, beštije hroni
Jerbo me tako život postavi.



Jo son dite od poja,
Dite ča me moja mati odgajala
Da škulu učin, a ostavin se poja,
Dite ča me čača uči:
“Čerce triba svega znot u životu, ali uči škulu“.
Ali mati, čača, kako da zaboravin poje,
Poje koje me odgajalo i hronilo,
Poje koje me naučilo če znači lavurat,
Poje koje mi nikad ni grubega reklo,
To poje je moj život.



Cila fameja, svi su se pojem hronili,
Pranono, nono i čača moj,
I more bit da se i ono već umorilo,
Jerbo je škrta zemja naša,
Ali škrta od nevoje,
Nevoje od pljačke i nepravde u lipoj našoj.
Težak je život težoka,
Jerbo težok je čovik koji možda nima velike škule,
Ali je to čovik koji se nikad neće predat,
Nikad neće reć ne mogu, neću,
Nikad mu ništa ni teško,
A za svoju fameju će sve napravit.
Subotom i nedijom kad svi po rivi šentadu,
On će u poje poć, jerbo uvik ima lavura,
Umisto da se i on bukun ferma.



Zato se ja nikad neću sramit,
Ko son ni odakle son,
Jerbo znon cjenit lavur,
Znon cjenit trud i muku našeg težoka.
Poje je moj ponos i uvi će bit,
I di god da pojden, reć ću u svit,
Da jo son mola od Jubota i Marine,
Jo son težaško dite!

Autorica Zorica K.