【講故台】序章《凍》．第三集

Day 1,806, 14:17 • Published in China North Korea • by Bloody hands

是咁的，有一日，係下雨天。
我地學校初中三年都係要留校食lunch的。
到左lunch time，我就去左拎盒飯坐低同其他毒撚們食飯。
當我埋頭苦幹食緊飯嘅時候，
突然，我身後就出現左個高年級校花。

高年級校花: 喂，血手！今日好大雨啊！我無帶遮，你有無遮可以借比我啊?
我: 有...
身為毒撚的我見到靚女多數都係一句起，兩句止。
俾左把遮佢之後我就坐返底食飯，但已經引來眾毒撚嘅目光。
但我都係照舊食飯，當咩都無發生過。
其實高年級校花係我老母嘅一個朋友嘅女，我同佢細佬由細玩到大。
有時會上佢屋企玩，所以就識佢家姐。

lunch time好快就完左，上上下堂嘅時候，
AA突然間問我: 頭先個女仔你女朋友黎架?好似好靚女！
我: 唔知
其實明明就唔係，唔通我要講句水是我開的?
之後就好似一天都光哂咁，佢問完我條問題之後就無再咬我。
而且佢開始變得好靜，好耐都無聽過佢出聲。

個感覺好似好奇怪咁，身邊無左個人煩你，
無左個人係到大呼小叫，無左個人係到胡言亂語。
好似有一點點嘅難過，一點點嘅失落，一點點嘅想念。只係一點點...
今日陌生的，是昨天熟悉的...
好似係…

好快咁又過左一個月，又黎到我"最愛"嘅調位時間。
故事黎到哩到，又係燒粟米咁橋，一早知你係粟一燒。
無錯，佢又係調左去我隔離。
但今次，我嘅感覺唔再係負面，心入面好似重有一絲絲嘅開心。
就係我地坐底左之後無幾耐，我feel到隻手暖暖地嘅?
原來佢拖住左我隻手！！
我果時好緊張！！咁大個仔第一次拖人隻手，應該係話第一次比人拖隻手！！
但係拖手仔既感覺完全感受唔到，是因我實在太緊張...
搞到成隻手都係手汗...
跟住AA一句:好嘔心啊！
佢就縮返隻手。
我果時完全怕羞到咩都唔敢講...只有靜坐...

之後我地就放小息，我即刻怕羞到行出走廊到同毒撚們吹水，
扮無事發生。
點知就係我地吹吹下水嘅期間，AA同BB就行左出黎，
AA就爆左句: 好凍凍， 攬攬!!
佢重要打開雙手咁講...
我身邊嘅毒撚們就開始起哄...
勁尷尬...
身為毒撚的我果時完全無諗過哩d男女關係...
我就好尷尬咁講: 吓...?
扮到咩事都唔知咁...
佢就好似好唔開心咁行返入班房。
而BB當然就係到怒啤我，再行返入去陪AA。
鐘聲嚮起，個小息咁就完左。
之後直到放學，我同佢成一句野都無講過...

到第日返到學校，今次係佢同d朋友係走廊吹水,
我見到佢地望都唔敢望就急急腳衝左入班房。
一入到班房，又有一種不妙嘅感覺...
個個都對住我露出369嘅笑容...

我就行埋我個位到啦，見到...

血手 (Day 1806)